Oda Dypvik Bjørke: Affektreguleringsprosessar i musikkterapi

Fagområde: Musikkterapi/Musikk og helse

Musikkterapi er anerkjend som ein kunnskapsbasert praksis i behandling av personar med psykoselidingar. Dette gjeld særleg i behandlinga av negative symptom, herunder eins evne til affektregulering. På trass av eit solid kunnskapsgrunnlag manglar det forsking som tek føre seg beskrivingar av kva affektreguleringsprosessar i musikkterapi består av.

Overordna problemstilling for studien:

Korleis kan musikkterapi bidra til affektreguleringsprosessar hjå pasientar med psykoseliding?

Problemstillinga blir konkretisert i følgjande spørsmål:

• kva karakteriserer affektreguleringsprosessar i musikkterapien?
• kva kan ei tverrfagleg fokusgruppe frå eit FACT-team bidra med kring kunnskap om affektreguleringsprosessar i musikkterapien?
• korleis beskriv pasientane sjølve endring i affektive tilstandar i musikkterapien?

Prosjektet er fundert i kvalitativ metode og vil undersøke korleis musikkterapi bidreg til affektreguleringsprosessar blant pasientar med psykoselidingar gjennom ulike datasett:

med utgangspunkt i analyse av video- og lydmateriale frå musikkterapisesjonar , ein tverrfagleg fokusgruppe sine observasjonar av eit utval frå same video- og lydmateriale og med intervju frå pasientar om deira opplevingar av affektreguleringsprosessar i musikkterapi.

Datamaterialet vil bli samla frå eit fleksibelt aktivt oppsøkande behandlingsteam (FACT). Prosjektet vil bidra med ny kunnskap om affektreguleringsprosessar og musikkterapi, og det vil bidra med forsking på psykisk helse- og rusfeltet.

***

Oda Dypvik Bjørke er teken opp på ph.d.-programmet i musikkforsking og ansatt som stipendiat frå 1. september 2025.